كثير مننا تسهر وتقوم متاخر يالله يمدي تسوي الغدا قبل يجي زوجها ويسوي كذا
وكثير مننا تكون جايتها الدوره وتعبانه مافيها حيل تقطع بصل ودجاج وطماط وتبي شي جاهز
وكثير مننا وزي يمكن مرات مايكون عندي شي شغل يعني بس ماله من الطبخ ولا لي خلق اطبخ وتعبانه منه
ومجبوره اطبخ لان فيه ابو الشباب
وكثير وكثير
واللي عندها دوام
هذا ياطويلات العمر علمتني اياها وحده الله يجزاها خير دايم مشاءالله لابسه كاشخه لزوجها وطابخه له الغدا ماعمرهم تغدو برا على كلامها الا اذا كان عشاء تقول يجي من الدوام تعبان حرام اصدمه واقول هات معاك غدا
العشاء مايخالف يكون على الاقل مرتاح
والطريقه هي تخصصين يوم كل اسبوعين او كل ماتقضيتو للبيت مثلا اذا رحتو تشترون هاتي الدجاج المبرد الطازج سوا فيليه او قطع
هاتيه وغسليه زين زين بملح وخل ونظفيه من قلب ثم قطعيه بالشكل اللي تستخدمين دايم مثلا نص تحطين نص فكيس مثلا مكعبات تقطعينه مكعبات صغار هذا الفيليه الصدور وتحطينه بصحون بلاستك على قد الطبخه اللي انتي متعوده تسوينها او بمقدار متساوي واذا احتجتي زياده طلع صحن ثاني معاه
وقصدريه بقصدير الصحون وصفيهم فوق بعض بالفريزر والقطع الكبيره حطيها باكياس واجمعيهم بسله فالفريزر بعد فرزنيهم
والحم زي الطريقه بعد
اللي لابغيتي تطبخين تطلعنيه وتخلينه يذوب وتغسلينه غسله وحده بس لانه نظيف من اول
هذا بالنسبه للدجاج والحم
تجين للبصل
لاتقضيتي هاتي خيشه بصل صغيره وصندوق طمام مو كبير
وقشري كل البصل اللي بالخيشه واغسليه وبالخلاط افرميه وحطيه مع زيت كافي للبصل على النار كشنيه تكونين سويتي بالطمام نفسه غسلتيه وقطعتيه قطع عشوائيه واطحنيه عصير طماط وصبيه على البصل لاذبل
واضيفي معجون طماط وبهارات وفلفل رومي مفروم مع فصين ثوم وزنجيبل اذا ودك انتي وفنك عاد
وخليه كشنه مسبكه ثم قسميه باكياس قد طبختكم اقصد قدركم واستعمالكم ثم بالفريزر بعد يجمد
لامنك راحت عليك نومه وطمرتي مفزوعه على طول روحي طلعي من الكشنه وحطيها بقدر على نار هاديه تذوب والدجاج طلعيه وانطليه فمويه فيها ملح علشان يذوب بسرعه واغسلي الرز على بال مايذوب الدجاج
واغسليها شطفه اخيره الدجاجه وحطيها على الكشنه وخليها تتسبك معاه
وكانك تبين معاه خضار حطي ثم تكونين حاطه بالغلايه مويه حار صبيها عليه <<<<<<< علمتك على طبخ كبسه ههههه كلكم عارفين تطبخون
بس علشان تفهموني وخليها تطبخ وانتي روحي اتحممي البس عطري بيتك لان مافيه ريحه بصل وطبخ بالبيت
وارجعي تلقينها استوت طلعيها كانك تبينها محمره دخليها الفرن ولا واكبسي على المرق الرز
وكشنه الرز نفس الشي بعد تروها تسويها مره مستويه وتقسمها باكياس
تقول الحمدلله ارتحت كثير صرت لاقمت بس انظف بالبيت واشوف عيالي مااشيل هم الطبخ
حتى لابغت مكرونه نفس الطريق ونفس الطريقه باي طبخه تبيها وانتي وشطارتك ياحلوه باداره بيتك
الحين ودي اسوي زيها بس للحين مافضيت بس اكيد اول ما استقر من ظروف التنقل راح اسويها وارتاح
مقال \ خريجه عاطله